СМИ

«Амыраны зынгæй хайджын»  18.07.1998 02:31

        Ирон адæм кæддæриддæр хъæздыг уыдысты сæ культурæйæ, сæрыстыр уыдысты сæ фæсивæдæй. Фæлæ абон нæ хистæр фæлтæр арæх бакатай кæнынц: «Цы уыдзæн нæ фидæн? Нæ фæсивæдæн сæ фыццагдæр сагъæс куы ссис мулк æмæ æхцайы катай». Бирæ фæхъуыды кодтам ацы хъуыддагыл. Ау, æмæ æцæг афтæ у? Ау, æппындæр ницыуал баззадис хорздзинадæй нæ фæсивæдмæ? Æмæ æрцыдыстæм ахæм хатдзæгмæ: нæ хæрзтæ не ׳взæртæй фылдæр сты. Уымæн нæ бон бирæ дæнцæгтæ æрхæссын у. табуафси, абон уал иу. 7 июлы Аграрон университеты Культурæйы хæдзары уыдис театр – студи «Амыран»-ы концерт, уыцы бон театрыл сæххæст афæдз. Уæд фыццаг хат бахаудтам сæ равдыстмæ. Æгæр раджы цыд фестæм, фæлæ уæддæр мидæмæ бахызтыстæм, нæ бынæттæ æрцахстам æмæ аивæй нæ цæст дардтам залмæ цæугæадæммæ. Адæм чыртæ-чыртæй æмбырдтæ кодтой. Уалынмæ кæсæм, æмæ раззаг рæнхъы бынæттæ æрцахстой Тæкъоты Сергей, хицауады Сæрдары хæдивæг, Гуыриаты Барис – культурæйы министры хæдивæг æмæ нæ ирон театры артисттæ. Агъуыст байдзаг алы кары адæмæй. Уæлдай æхсызгон та нын уыдис уый, æмæ дзы фæсивæдæй къух бакæнæн дæр нæ уыдис. Мах дисы бафтыдыстæм: «Æвæццæгæн ам уыдзæнис диссаджы равдыст, æнддæр утæппæт адæм нæ ныуагътаиккой сæ куыстытæ æмæ ардæм не ׳рбацыдаиккой». Кæй зæгъын æй хъæуы, нæ хъуыды нæ нæ фæсайдта. Адæм æмхуызонæй цин кодтой сценæйы архайджытимæ, æмхуызонæй – иу æрæнкъард сты. Алы номыры фæстæ сын – иу сарæзтой тыхджын къухæмдзæгъд. Равдысты фæстæ ныл цыма бæстæ ныррухс, афтæ нæм каст. Исдугмæ нымдзаст стæм адæмы цæсгæмттæм, сæ цæстытæ æрттывтой хъæлдзæгдзинадæй. Тынг бирæ хорз æнкъарæнтæ баззад нæ зæрдæты æмæ нæ бафæндыд бæлвырддæр базонгæ уæвын театримæ.

       Дыккаг бон фембæлдыстæм театр–студи «Амыран»-ы сæргълæууæг Лазарты Таймуразимæ æмæ нæм рауад ахæм ныхас:

      - Таймураз, куыд дæм кæсы, уæ равдыстытæ цы ахъаз сты нæ фæсивæдæн?

      - мах нæ равдыстыты архайæм равдисын, Ирыстоны фæсивæдмæ ныртæккæ цы хъæндзинæдтæ ис, уыдон. Зæгъæм, ис нæм иу равдыст «Усгур Гаци» нырыккон варианты. Уым Уæхæнæз Гацийæн ǽвдисы, ныртæккæйы заманы сиахс куыд дары йæхи, уый. Мæнмæ гæсгæ, уыцы хъæндзинæдтæ куы февдисынц артисттæ, æмæ адæм тыхджын къухæмдзæгъд куы саразы æмæ хъæрæй куы фæхуды уыцы хъæндзинæдтыл. Уый фæсивæдæн æвдисы, уый, æмæ ахæм митæ кæнæн нæй. Мæнмæ гæсгæ, фæсивæд уый ахур кæнынц.

       - Æмæ уæдæ æхцайы фæрæзæй та куыд ифтонг стут?

       - Ǽхцайы фæрæзты хабар æвзæр вæййы, фæлæ уый æфсон нæу, цæмæй куыст размæ ма цæуа, уымæн.уæдæ нæ театры гардеробы цы дарæс ис, уыдон лæппутæ æмæ чызджытæ сæхæдæг æрбахастой, цыдæртæ дзы хуыйгæ дæр бакодтой, ома, æлхæнгæ ницы бакæнæм.

       - Нртæккæ та исты ног равдыстытæ цæттæ кæнут?

       - Нæ университетæн октябры мæйы уыдзæн юбилей, сæххæст ыл 80 азы, æмæ ныртæккæ мах тынг разæнгардæй цæттæ кæнæм нæхи уыцы бæрæгбонмæ. Тынг бирæ уазджытæ нæм уыдзæн алырдыгæй, æмæ мах хъуамæ нæхи хорз равдисæм.

       - «Амыран» ныртæккæ лæуд у фæрныг фæндагыл. Хуыцау зæгъæд, æмæ уын куыд бантыса дыууæ Ирыстоны кæрæдзимæ бангомдæр кæнын... аивады бæрзонддæр къæпхæнтæм куыд схизат, ахæм арфæ уын Дунейы фарн ракæнæд. Афæдз йеддæмæ уыл нæма цæуы, фæлæ уыцы цыбыр рæстæгмæ уæхи тынг бауарзын кодтат адæмæн, гъемæ рæствæндаг ут. Ирыстоны кадджындæр адæмы æмрæнхъ æрлæуут, уымæн æмæ кадджын суæвынæн æрдз дыккаг цард нæ дæтты.

        Уастырджи де ׳мбал, «Амыран»!

 Газета «Слово»

        №53 (8570) 18 июля 1998 г.

        «Амыраны зынгæй хайджын»

                                                                                  Æчеты Оксанæ,

                                                                                  Куындыхаты Зæринæ,

                                                                                  ЦИПУ – йы журналистикæйы хайады 1-æм курсы студенткæ.